Aaron Hardie ne ek yaadgaar all-round performance ke zariye Peshawar Zalmi ko Pakistan Super League (PSL 11) ke final me Hyderabad Kingsmen ke khilaf shandar jeet dilayi. Yeh match Gaddafi Stadium me khela gaya.
Zalmi ke captain Babar Azam ne toss jeet kar pehle bowling ka faisla kiya, jo bilkul sahi sabit hua. Aaron Hardie ne bowling me lajawab performance dete hue 4 overs me sirf 27 runs dekar 4 wickets hasil kiye. Unki zabardast bowling ki wajah se Hyderabad Kingsmen sirf 129 runs par all out ho gayi (18 overs me).
130 runs ka target chase karte hue Zalmi ki shuruat bohat kharab rahi, jahan team sirf 40 runs par 4 wickets kho baithi. Lekin is mushkil waqt me Aaron Hardie ne zimmedari uthayi aur match ko sambhala.
27 saal ke Australian all-rounder ne pressure situation me outstanding batting karte hue 39 balls par na-out 56 runs banaye, jisme 9 boundaries shamil thi. Unki is inning ki badolat Zalmi ne target 28 balls pehle hi hasil kar liya aur 5 wickets se match jeet liya.
Aaron Hardie ko apni shandar performance par “Player of the Final” ka award diya gaya. Apne pehle PSL season ke bare me baat karte hue unhone kaha:
“It’s been great. Sab players, coaching staff aur management ke sath experience bohat acha raha. PSL journey ka is se behtar start nahi ho sakta.”
Unhon ne mazeed kaha ke wo Peshawar Zalmi ka hissa ban kar bohat khush hain aur team ke sath unhone ek successful season enjoy kiya.
Is performance ke sath Aaron Hardie ne T20 franchise cricket ki history me ek naya record bhi bana diya — wo pehle player ban gaye hain jinhon ne kisi final me 4 wickets li aur sath hi 50+ runs bhi score kiye.
